الساعه دلوقتى 1 ونص بتوقيت اللاب بتاعى

نفسى انهارده مفتوحه للكتابه  قعدت افكر اكتب ايه جت على بالى اكتب ف حاجه كنت بفكر فيها من كام يوم

مش عارف الحاجه دى عندى انا بس ولا عند كل الناس

الحاجه دى ارتباط الاصوات والراويح عندى بأماكن وذكريات

يعنى مثلا لما بشم ريحه اليود ف الجو بفتكر اسكندريه والرحلات واصحابى…

مثلا ريحه حرق قش الرز مع انها ريحه رخمه بس بعرف اننا خلاص دخلنا على بدايه الدراسه والصحيان بدرى(اللى انا ودعته السنادى الحمد لله)

وكمان بدايه دخول الشتا اللى هو فصلى المفضل ف السنه وبستغرب جدا ان فى ناس مبتحبوش

يقوللك ياعم دا مليان شتا والشوارع بتبقى مقرفه وساقعه وكدا…انا بشوف الحاجات دى ممتعه جدا

منظر الشتا والواحد واقف ف الشارع او واقف ف البلكونه وبدعى وابواب السما مفتوحه

صوت الرعد ونور البرق ف السما بعد نص الليل…البرد اللى بيلسع الواحد وهو ماسك كبايه حمص الشام وواقف اودام البحر

نرجع تانى للاصوات والروائح والذكريات

طبعا صوت فيروز له ارتباط جامد جدا عندى بالشتا صوتها بيعمل جو من الدفء جدا ف وسط البرد وبحس ان فى امل وتفاؤل جامد

حاجه تانيه ليها تأثير قوى عندى من الاصوات وهو صوت محمد محى بالرغم ان ناس كتير مبتحبوش مش عارف ليه…..بس انا بحترم البنى ادم اللى بيسمعه وبيحبه جدا

صوته عندى مرتبط بالصيف بحبه برضو بس مش زى الشتا

عشان كان هو تقريبا اول حد اسمعله وانا صغير وعرفت بقى الرومانسيه منه وانا فاكر اياميها مكانش الشريط بتاعه بيتشال من الكاسيت

كمان صوت ام كلثوم اللى انا بحبه جدا بيفكرنى بالسفر

كنت لما بسافر مع والدى ف اى مكان لو مسافرين او راجعين بالليل يشغل الراديو ونسمع ام كلثوم

كان بيبقى احساس جميل جدا والدنيا ضلمه ع الطريق والهوا من كل مكان وام كلثوم بتبدع بقى بأغنيه انت عمرى

اللى فكرنى بالكلام دا ان دلوقتى مبقتش بحس للحاجه طعم زى زمان ومش عارف ليه

كان زمان رمضان له ريحه ف الشوارع ويوم وقفه العيد وصلاه العيد والاطفال ماسكين بلالين وفرحانين بلبس العيد

والعيد الكبير والناس ف الشوارع بتدبح والاطفال برضو ملومين ما بين فرح بالمنظر وخوف منه ف نفس الوقت

حاجات كتير اوى من دى مبقتش موجوده بس من حين لاآخر الواد بيحب يتفكرها اوحتى يعملها هو بنفسه

نفسى ارجع تانى لأيام زمان….بس للأسف مبقاش ينفع بقى

ف النهايه اسيبكم بقى مع الاغنيه الجامده دى

كل سنه وكل الناس طيبه وف هنا وسعاده على طول

كل يوم حب وانتوا كلكوا طيبين

اهلى واصحابى وكل الناس اللى اعرفهم

الحقيقيه انا كنت ناوى اعمل البلوج ف الاجازة من اولها

بس لما لقيت مناسبه حلوة زى يوم الحب قررت انها تكون

اول يوم اكتب فيه بوست ف البلوج وخروج البلوج للنور

وبالرغم من انى مش مرتبط فالناس اكيد هتستغرب ودا بيحتفل بقى بيوم الحب على اى اساس

الاساس ان يوم الحب دا مش الحب اللى بين اى اتنين مرتبطين بس

لا الحب دا ممكن يكون حب الام,الاب.الاخوات وكمان الاصحاب

عشان كدا يبقى من حقى احتفل انا كمان بيوم الحب.

عموما عشان مطولش

كل سنه وانتوا طيبين

Welcome to WordPress.com. This is your first post. Edit or delete it and start blogging!